“Говь” ХК энэ оны III улирлын байдлаар 166.4 тэрбум төгрөгийн борлуулалтын орлоготой ажилласнаа тайлагналаа. Энэ нь өмнөх оны мөн үеэс 59 хувиар өссөн үзүүлэлт болж байна. Тайлант хугацаанд тус компанийн цэвэр алдагдлын хэмжээ 71 хувиар буурч, 3.8 тэрбум төгрөг болжээ. 

Тус компани борлуулалтын орлогынхоо дийлэнхийг буюу 62 хувийг дотоодын үйл ажиллагаанаас олсон байна. Дотоодын зах зээлийн борлуулалт нь өнгөрсөн оны мөн үеэс 88 хувиар өссөнийг онцолжээ.

Борлуулалтын орлогынх нь 24 хувийг экспорт нь бүрдүүлсэн бол 14 хувийг гадаад дахь салбар нэгжийн үйл ажиллагааны орлого бүрдүүлсэн байна.

Цар тахлын нөлөөлөл буурч, дэлхий даяар аялал жуулчлалын салбар сэргэж эхэлсэн зэрэг гадаад орчны нөхцөл байдал өнгөрсөн онтой харьцуулахад сайжирсан нь "Говь" компанийн дотоод болон гадаад зах зээлийн борлуулалтад эерэг нөлөөтэй байгаа аж.