“Могойн гол” ХК 2022 онд 120 мянган тонн коксжих нүүрс, 30 мянган тонн эрчим хүчний нүүрс олборлож, 130.3 мянган тонн нүүрс борлуулснаа тайлагналаа.

Нүүрсний борлуулалт нь өмнөх онтой харьцуулахад 30.3 хувиар өссөн байна. Тайлант хугацаанд Хөвсгөл, Завхан аймгийн 100 гаруй байгууллага, аж ахуйн нэгжтэй гэрээ байгуулан хамтран ажиллажээ.

2022 онд Эрдэнэт хотод нийлүүлсэн нүүрсний хэмжээ хамгийн их буюу өмнөх оноос 20 мянган тонноор өссөн дүнтэй байна. Энэ нь худалдан авагч талд эрэлт өндөр байгааг харуулж байгаа юм.

Мөн сүүлийн жилүүдэд тус компанийн уурхайн олборлолт, борлуулалт тогтмол өсөж компанийн цэвэр ашиг нэмэгдэж байгаа аж. Тухайлбал: өнгөрсөн онд 1.2 тэрбум төгрөгийн цэвэр ашигтай ажилласан нь өмнөх оноос 1.5 дахин өссөн үзүүлэлт боллоо.

Үүнээс гадна “Могойн гол” ХК энэ сарын 17-нд хувьцаа эзэмшигчдийн хурлаа хийж, нэмэлт хувьцаа гаргах асуудлыг хэлэлцэхээр болсныг Монголын Хөрөнгийн бирж мэдээлэв.

Тус компанийн нэгж хувьцааны ханш он гарсаар хоёр дахин өсөж, 18 мянга 500 төгрөг хүрчээ. “Могойн гол” ХК-ийн зах зээлийн үнэлгээ 15.3 тэрбум төгрөгөөр хэмжигдэж байна.