Уналттай буюу “Баавгай” зах зээлийн мөчлөг хараахан дуусаагүй тул хөрөнгө оруулагчид 2023 онд өндөр хүлээлттэй байх хэрэггүйг “Goldman Sachs” банкны шинжээчид анхааруулж байна. 

“Хувьцааны ханш өндөр түвшинд тогтворжих нөхцөл байдал үүсэх арай болоогүй. Бодлогын хүү дээд түвшинд хүрсэн ч компаниудын зах зээлийн үнэлгээ сул байгаа нь хөрөнгийн зах зээлийн сэргэлтээс өмнө заавал уналт үүсэхийг харуулж байна” хэмээн Питер Оппенхаймерийн тэргүүлсэн стратегичид өгүүлжээ. Тэдний тооцоолсноор “S&P 500” индекс 2023 оны эцэс гэхэд 4000 нэгж орчимд буюу баасан гарагт арилжаа хаагдах үеийн ханшнаас ердөө 0.9 хувиар өндөр түвшинд очих аж. Харин Европын жишиг индекс “Stoxx Europe 600” ирэх оны эцэст дөрвөн хувиар өсөж, 450 нэгж хүрэхээр байна. 

Сүүлд АНУ-ын инфляцын дүн мэдээлэл тооцооллоос тааруу гарсан, мөн БНХАУ цар тахлын дэглэмээ сулруулах хүлээлт үүссэн нь дэлхийн хэд хэдэн индексүүд аравдугаар сарын дунд үеэс хойш анх удаа огцом өсөж, “Бух” зах зээлийн түвшинд очиход нөлөөлжээ.