Сар шинийн баярын амралтын үеэр суларсан эрэлт хараахан сэргээгүй байгаатай холбоотойгоор БНХАУ-ын хойд боомтуудад эрчим хүчний нүүрсний үнэ багагүй хувиар буурчээ. Хэдийгээр үйлдвэрлэлийн гол бүсүүдэд үнэ харьцангуй тогтвортой, зарим үед өсөлттэй байгаа ч боомтууд дээрх үнэ ийнхүү эсрэгцэж байгааг “SXCoal” онцолж байна.

Нэгдүгээр сарын 30-ны байдлаар 5500 ккал илчлэг бүхий эрчим хүчний нүүрсний үнэ тонн нь 1190-1210 юанийн үнэтэй байсан бол 5000 ккал илчлэгтэй нүүрс тонн нь 1030-1060 юаниар худалдаалагдаж байжээ. Өмнөх өдөр нь дээрх төрлийн нүүрсний үнэ 1200-1220 юань болон 1050-1070 юанийн хооронд зарагдаж байсан байна.

Сар шинийн баярын амралт дууссан ч үйлдвэрүүд хэвийн үйл ажиллагаандаа эргэн орохын тулд нэгээс хоёр долоо хоног шаардлагатай байдаг тул эцсийн худалдан авагчдын эрэлт сулраад байгаа ажээ.

Худалдан авалтын үнэ борлуулалтын үнээс давах “урвуу үзэгдэл” ажиглагдаж байгаа тул амралтын дараа худалдаа хийхэд хүндрэлтэй байгааг нүүрс арилжаалагчид онцолж байна. Үүний хажуугаар галт тэрэгний тээвэрлэлтийн хуваариа алдахгүй байх үүднээс эрэлт сул байгааг үл харгалзан уурхайгаас боомт хооронд байнга тээвэрлэлт хийх шаардлага үүсжээ. Үйлдвэрлэлийн гол бүсүүдэд уурхайн амны үнэ өсөх тусам үнийн урвуу үзэгдэл үргэлжлэх төлөвтэй байна.

“SXCoal”-ийн нэгдүгээр сарын 30-ны судалгаанд хамрагдсан нүүрсний 20 уурхайн зургаа нь борлуулалтын үнээ тонн тутамд 10-30 юаниар нэмэгдүүлээд байгаа ажээ.