Узбекистан улсад болж буй Шанхайн Хамтын Ажиллагааны Байгууллагын (ШХАБ) гишүүн орнуудын хуралдааны хүрээнд БНХАУ-ын Ерөнхийлөгч Ши Жиньпин ОХУ-ын Ерөнхийлөгч Владимир Путин нар өнөөдөр биечлэн уулзаж, Украины дайн зэрэг олон улсын асуудлыг хэлэлцэнэ гэж Кремль мэдээллээ. 

Өмнөх уулзалтаараа хоёр удирдагч АНУ-ын ноёрхлыг сөрж, олон туйлт дэлхий бий болгохын тулд “Ямар ч салбарт хамтын ажиллагаагаа хязгаарлахгүй” тухай хамтарсан мэдэгдэл гаргаж байв. 

Украинд дайн эхэлсний дараа АНУ болон холбоотон орнуудын тавьсан хориг арга хэмжээнээс үл хамааран БНХАУ-ОХУ-ын эдийн засгийн түншлэл нэмэгдсэн юм. Энэ оны эхний таван сард л гэхэд ОХУ-аас БНХАУ-д экспортолсон бараа, бүтээгдэхүүний хэмжээ 50 хувиар өсөж, 40.8 тэрбум ам.доллар хүрчээ.

Хэдий тийм боловч Бээжин өрнөдийн хориг арга хэмжээнд өртөхөөс сэргийлэх үүднээс одоо хүртэл ОХУ-д зэр зэвсгийн болон санхүүгийн тусламж үзүүлээгүй байгаа юм. Кремль дрон, сумны нөөцөө бүрдүүлэхийн тулд Иран, БНАСАУ-д хандахад хүрсэн аж.

Тиймээс өнөөдрийн уулзалтын дараа ч ОХУ-д үзүүлэх тусламжийн талд Бээжингийн байр суурь өөрчлөгдөх магадлал бага гэж шинжээчид үзэж байна. Санхүүгийн хориг арга хэмжээнээс шалтгаалан амь нас, эдийн засгийн хохирол учрах нь БНХАУ-ын Коммунист намд улс төрийн томоохон цохилт болох эрсдэлтэйг тэд онцолжээ. 

Сүүлийн өдрүүдэд Украины армийн сөрөг давшилтууд амжилттай болж, ОХУ-д эзлэгдсэн 6000 км² газар нутгаа чөлөөлөөд буй. Одоогийн байдлаар Украины газар нутгийн 20 орчим хувь нь ОХУ-ын хяналтад байгаа ч Владимир Путин байдлыг эргүүлэн гартаа авахын тулд эрчимтэй давшилт эхлүүлнэ гэсэн болгоомжлол өндөр байна.