Баяр ёслолын өдрүүдэд “iPhone” гар утасны нийлүүлэлт буурна гэсэн болгоомжлолын нөлөөгөөр “Apple” компанийн нэгж хувьцааны үнэ 2021 оны долоодугаар сараас хойших хамгийн доод түвшинд хүрч уналаа.

Мягмар гарагт тус компанийн хувьцааны ханш 1.4 хувиар унаснаар арилжааны гурван өдөр дараалан “Улаан бүс”-д хаагдсан байна. Хэдий тийм боловч 2022 он гарсаар “Apple”-ийн хувьцааны ханш 27 хувиар унасан нь бусад технологийн компаниудыг бодвол тийм ч тааруу үзүүлэлт биш бөгөөд “Nasdaq-100” индекс 34 хувиар унаад байгаа юм.

“Apple”-ийн хувьцааны ханш суларч байгаа нь БНХАУ дахь “iPhone”-ийн гол үйлдвэрлэлийн үйл ажиллагаа тасалдаж, нийлүүлэлтийн хомсдол үүсгэсэнтэй холбоотой аж. “JPMorgan” банкны шинжээчдийн үзсэнээр “iPhone”-ийн нийлүүлэлт сайжирч, аажмаар эрэлттэйгээ зэрэгцэхэд дөхөж байна. Хэдий тийм боловч жилийн энэ цагт ерөнхийдөө “Apple”-ийн бүтээгдэхүүнүүдийн эрэлт нийлүүлэлт хоорондын зөрүү нэмэгдэх хандлагатай байдгийг анхааруулжээ. 

Мөн БНХАУ-ын ухаалаг гар утасны нийлүүлэлтийн сүүлийн тоо баримтаас харвал энэ салбарт зарим саад тотгор учрахаар байгааг тодотгож байна.

Өргөн хүрээгээр харвал мягмар гарагт технологийн салбарын хувьцаанууд уналттай байсан бөгөөд “Nasdaq-100” индекс 1.5 хувиар унажээ. АНУ-ын Холбооны Нөөцийн банк инфляцтай тэмцэхийн тулд хатуу чанга бодлогоо үргэлжлүүлэх хүлээлт хөрөнгө оруулагчдын дунд үүссэнтэй зэрэгцэн тус салбар 2000-аад оны интернэт компаниудын хөөсрөлөөс хойших хамгийн тааруу үзүүлэлттэй 12 дугаар сараа үдэж байгаа юм.