Энэ онд Индонез улсад 99 хүүхэд бөөрний архаг дутагдлаар нас барсантай холбогдуулан сироп хэлбэрийн эмийн худалдааг тус улсад хориглолоо.

Одоогийн байдлаар дээрх өвчний 206 тохиолдол бүртгэгдсэний дийлэнх нь зургаагаас доош насны хүүхдүүд байсан бөгөөд Индонезийн Эрүүл мэндийн яамнаас шалгалт хийж, шалтгааныг нь нарийвчлан тогтоох хүртэл хоригийг үргэлжлүүлэх юм байна. 

Усан эмийн найрлагад хортой бодис агуулагдсан байж болзошгүй эсэхийг албаны хүмүүс судалж байгаа аж. Наймдугаар сарын эцсээс хойш хүүхдүүдийн дунд бөөрний дутагдлын тохиолдол эрс өссөнийг Индонез улсын Эрүүл мэндийн яамны Хэвлэлийн төлөөлөгч мэдээлжээ.

Түүнчлэн энэ онд Африкийн Гамби улсад 69 хүүхэд дээрхтэй төстэй өвчний улмаас нас барсан нь БНЭУ-ын “Maiden Pharmaceuticals” компанийн үйлдвэрлэсэн ханиадны сироптой холбоотой гэж дүгнэсэн байна.

Дэлхийн Эрүүл Мэндийн Байгууллагаас бусад орнуудад худалдаалагдаж байж болзошгүй талаар анхааруулсан сиропын худалдаанд Индонез улс зөвшөөрөл олгоогүй аж. Хэдий тийм боловч сироп хэлбэрийн эмд уусгагчийн зориулалтаар ашигладаг глицерин болон пропилен гликолд бохирдуулагч бодис агуулагддаг байж магадгүй болохыг тус улсын Хүнс, эмийн агентлаг анхааруулсан байна.

Индонезийн Засгийн газраас 18 төрлийн шингэн парацетамол болон бусад сироп хэлбэрийн эмүүдийн найрлагад шинжилгээ хийхэд 15-аас нь хортой байх магадлал өндөр этилен гликол хэмээх уусгагч бодис илэрснийг тус улсын Эрүүл мэндийн дэд сайд Данте Саксоно Харбувоно онцоллоо.