“Apple” компани есдүгээр сарын есөнд болох “iPhone 16” болон бусад шинэ бүтээгдэхүүнийхээ танилцуулгын арга хэмжээний урилгыг илгээж эхэлжээ. Уламжлал ёсоор Калифорнийн Купертино дахь “Apple Park”-д болохоор товлогдсон арга хэмжээний сэдвийг “Siri” дижитал туслахын шинэ хувилбарын интерфейстэй холбон "It’s Glowtime" хэмээн нэрлэсэн байна.

Өмнө нь “Apple” танилцуулгын арга хэмжээгээ есдүгээр сарын 10-нд хийхээр товлосон байсан ч АНУ-ын Ерөнхийлөгчийн сонгуульд нэр дэвшигч Дональд Трамп, Камала Харрис нарын эхний мэтгэлцээнтэй давхцахаар байсан тул нэг өдрөөр наашлуулсан бололтой.

“iPhone 16”-ийн “Pro” загварууд илүү том дэлгэцтэй, камерын шинэ функцүүдтэй, зураг дарахад зориулагдсан биет товчлууртай байх нь одоогоор ил болоод байгаа юм. Мөн танилцуулах арга хэмжээгээр яригдах гол сэдэв нь “iPhone”-ийн бүх шинэ загварт нэвтэрч буй хиймэл оюуны багц функц “Apple Intelligence” байх төлөвтэй байна.

Шинэ загварын “iPhone”-уудаас гадна “Apple” компани ухаалаг цагнууд болон “Airpods” чихэвчдээ томоохон өөрчлөлт хийхээр бэлтгэж байгаа аж. “Apple Watch”-ийн шинэ загвар өмнөхөөсөө илүү том дэлгэцтэй, нимгэн байхаас гадна хуванцар их биетэй, хямд үнэтэй “Watch SE”-ийн анхны загварыг гаргахаар төлөвлөжээ.