“Meta Platforms” компанийн хувьцааны ханш 172 хувиар өссөнтэй зэрэгцээд Марк Закерберг тус компанид эзэмшдэг хувьцаагаа сүүлийн хоёр жилд анх удаа худалдлаа. “Bloomberg”-ийн дата мэдээллээр тэрбээр нийт 682 мянган ширхэг хувьцаагаа 185 сая орчим ам.доллароор зарсан байна.

Марк Закербергийн  хөрөнгийг удирддаг байгууллагууд 2021 оны 11 дүгээр сараас хойш анх удаа ийнхүү “Meta Platforms”-ийн хувьцааг худалдсан аж. Энэ он гарсаар 11 дүгээр сар дуусах хүртэлх хугацаанд “Meta Platforms” компанийн хувьцааны ханш 172 хувиар өссөн үзүүлэлттэй байна. Ингэснээр “Nvidia”-аас бусад технологийн томоохон компаниудыг өсөлтөөрөө гүйцээд байгаа юм.

Сүүлийн байдлаар өдгөө 39 настай Марк Закерберг “Meta Platforms” компанийн 13 хувийг эзэмшиж байна. “Bloomberg Billionaires Index”-ийн мэдээллээр энэ нь түүний 117.7 тэрбум ам.долларын хөрөнгийн дийлэнх хэсгийг бүрдүүлж байгаа ажээ.