"ТЖТБ ХХК-ийн "Green Recycle" бонд хөтөлбөрийн I транчийн анхдагч зах зээлийн арилжаа эхлээд байна. Тус компани энэхүү бондоор 11 сая ам.долларын санхүүжилт татахыг зорьж байгаа юм.

Бондын нэрлэсэн үнэ нь 100 ам.доллар, жилийн хүү нь 10 хувийн нөхцөлтэй 36 сарын хугацаатай.

Оны эхний хагас жилийн байдлаар арилжааны банкнуудын оролцсон ногоон зээлийн хэмжээ нэг их наяд 73 тэрбум төгрөг байсан бол зөвхөн “ТЖТБ" ХХК-ийн бондын нийлбэрээр 120 тэрбум ам.доллар болох төлөвтэйг “TDB Securities” мэдээллээ. Эндээс харахад хөрөнгийн зах зээлд ногоон бизнес тэлэх боломжтой гэж үзэж байгаа аж.

"Green Recycle" бонд нь Монгол Улсын дотоод зах зээлд гарч буй “Sustainable Fitch” байгууллагаас анхны “Excellent” үнэлгээ бүхий санхүүгийн бус салбараас гарч буй анхны ногоон бонд гэдгийг онцолж байна.

“Арилжааны банкнуудын ам.долларын хадгаламжийн зарласан дундаж хүүгээс 6-7 нэгж хувиар өндөр өгөөж хүртэх боломжтой. Мөн бондын хагас жил тутамд төлөгдөх купоноор дахин хөрөнгө оруулалт хийх замаар бодит өгөөжийн түвшнийг нэмэгдүүлэх давуу талтай”-г “TDB Securities” тодотголоо.

Татан төвлөрүүлсэн хөрөнгөөр хуванцар савыг анхны эх үүсвэр дээр нь ангилах, тээвэрлэх, бэлтгэн нийлүүлэх дэд бүтцийг нийслэлд төдийгүй орон нутгуудад бий болгож, Монгол Улсын хог хаягдлын менежментийг сайжруулахаар төлөвлөжээ.

Монголын Хөрөнгийн бирж аравдугаар сарын 25-31-ний өдрүүдэд “ТЖТБ" ХХК-ийн “Green Recycle” ам.долларын бондын I транчийн анхдагч зах зээлийн арилжааны захиалгыг биржийн IPO системээр  дамжуулан хүлээн авна. Захиалга дүүрмэгц хаах нөхцөлтэй бөгөөд тогтоосон үнийн аргаар үнэт цаасны хуваарилалтыг хийх юм байна.