2024 оны эцсийн байдлаар Монгол Улсын хүн ам гурван сая 546 мянга болж, өмнөх оноос 1.2 хувиар өссөнийг Үндэсний статистикийн хороо мэдээллээ.

2024 онд дотоодод болон гадаадад нийт 60 мянга 214 хүүхэд төрсөн нь 2023 оныхоос 10 орчим хувиар буурсан үзүүлэлт болж байна. 2014, 2015 оны үед 80 мянга давж байсан төрөлт, 2019 онд 79.5 мянга болсноос хойш тасралтгүй буурсаар байгаа юм. 2024 онд л гэхэд улсын хэмжээнд 57 мянга 757 хүүхэд төрсөн нь 2023 оныхоос 10.2 хувиар, 2020 оныхоос 24 хувиар буурсан дүн боллоо. Ийнхүү төрөлт буурснаар 2030-2031 оны хичээлийн жилд ерөнхий боловсролын сургуульд элсэгчдийн тоо буурахаар байна.

Хуучнаар Хөдөлмөр, нийгмийн хамгааллын яамны хөдөлмөрийн зах зээлийн судалгаагаар 1991-2005 онд төрөлт хамгийн бага түвшинд байжээ. Тухайн үед төрсөн хүүхдүүд 2024 оны байдлаар 18-33 насныхан байгаа нь хөдөлмөрийн зах зээлийн гол бүлэг болж, ажиллах хүчний оролцооны түвшин буурахад нөлөөлж байгаа аж. Бага төрөлтийн нөлөө нь 2028 он хүртэл үргэлжлэх төлөвтэй байгааг тайланд онцолсон байна.

Үүнээс гадна ажиллах хүчний оролцооны түвшин буурахад бодит цалин дорвитой өсөхгүй байгаа, цаашид хүмүүсийн гадаадад амьдрах сонирхол буурах хандлага ажиглагдахгүй байгаа зэрэг нөлөөлж буйг тайланд дурджээ. 

Хэрэв гадаадад шилжих хөдөлгөөнийг бууруулах үр дүнтэй арга хэмжээ авахгүй бол 2035 он гэхэд гадаадад шилжих хөдөлгөөн 206 орчим мянгад хүрэх тооцоо байна. Энэ нь 2020 оныхтой харьцуулахад 68.9 хувиар өндөр дүн болох юм.

Ажиллах хүчний эрэлт талаасаа 2035 онд дотоодын нийт бүтээгдэхүүний өсөлтийн зорилтод хүрэхийн тулд 1.8–1.9 сая орчим ажиллах хүч шаардлагатайг тайланд онцолжээ.

Үндэсний статистикийн хорооны тайлангаас харахад 2024 оны IV улирлын байдлаар Монгол Улсаас хөдөлмөрийн гэрээгээр гадаадад ажил эрхлэхээр зуучлуулсан иргэд  өмнөх улирлаасаа 22.8 хувиар өссөн байна. 30 орчим хувь нь 25-29 насныхан болон бакалавр, магистр, докторын зэрэгтэй хүмүүс байжээ.