“АПУ” ХК-ийн борлуулалтын орлого 2023 онд нэг их наяд төгрөг хүрснийг тайлагналаа. Энэ  нь өмнөх оноос 29.4 хувиар өссөн үзүүлэлт төдийгүй дээд үзүүлэлт болж байна.

Өнгөрсөн оны хагас жилийн байдлаар тус компанийн борлуулалт 32 хувиар өссөнийг мэдээлж байсан юм. Өсөлтөд сүү, сүүн бүтээгдэхүүний борлуулалт, “Дижитал концепт” ХХК болон экспортын борлуулалтын өсөлтөөс хамаарсан байна.

2023 онд “АПУ” компанийн цэвэр ашиг өмнөх оноос 7.5 хувиар буурч, 116.4 тэрбум төгрөг болжээ. Хөдөө аж ахуйн салбарын дэмжсэн төслүүд “Дижитал концепт” ХХК-ийн үйл ажиллагааны тэлэлттэй холбоотой хөрөнгө оруулалт хийж байгаа юм. Үүнээс хамааран холбогдох өр төлбөр, гадаад санхүүжилтийн зээлийн хэмжээ өссөнийг өнгөрсөн оны хагас жилийн тайландаа мэдээлж байв.

Дотоодод бяслагийн үйлдвэрээ нээснийг онцолж болохоор байгаа төдийгүй гадаад зах зээлийг харвал Казахстан улс руу экспорт хийх гэрээ байгуулан ажиллаж байна. Мөн БНХАУ-д бүтээгдэхүүнээ дахин нийлүүлж эхлээд байгаа юм.