Шувууны аж ахуй эрхлэгчид ойрын 2-3 жилд дотоодын өндөгний хэрэглээг 100 хувь хангах боломжтойг Монголын шувууны аж ахуй эрхлэгчдийн холбооноос мэдээллээ.

Одоогоор үндэсний үйлдвэрлэгчид дотоодын зах зээлийн 60 гаруй хувийг хангаж байна. Зах зээлээ бүрэн хангахад Засгийн газрын импортын өндөгний талаарх бодлого шийдвэр чухал болохыг салбарын холбоо онцолж байна.

Цар тахлаас хойш дотоодод өндөгний үйлдвэрлэл 20-25 хувиар нэмэгдсэн бол ОХУ-д өндөгний нийлүүлэлт багассанаар 2024 он гарсаар өндөгний импорт эрс буурсан аж. Гаалийн ерөнхий газрын мэдээллээр оны эхний дөрвөн сард 980.1 мянган ам.долларын өндөг импортолсон нь өмнөх оны мөн үеэс 80 орчим хувиар буурсан үзүүлэлт болж байна.

2023 онд Монгол Улсын өндөгний жилийн хэрэглээ 400-450 сая ширхэг хүрчээ. Нэг хүний өндөгний жилийн хэрэглээ 180-200 ширхэг байгаа нь таван жилийн өмнөхтэй харьцуулахад хоёр дахин нэмэгдсэнийг Монголын шувууны аж ахуй эрхлэгчдийн холбоо мэдээллээ.