2022 оны байдлаар Монгол Улсын хүн амын ядуурлын түвшин 27.1 хувь болж, 914.2 мянган хүн ядуурлын шугамаас доогуур хэрэглээтэй амьдарч байгааг Үндэсний статистикийн хороо мэдээлэв. Энэ нь 2020 оноос 0.7 хувиар буурсан ч ядуурал өндөр түвшинд байсан хэвээр байна.

Үндэсний статистикийн хороо, Дэлхийн банктай хамтарч 2010 онд тогтоосон ядуурлын суурь шугамыг 2022 он болгон шинэчилсэн юм. Монгол Улсын насанд хүрсэн нэг хүн эрүүл, идэвхтэй амьдрах хэрэглээгээ хангахад шаардлагатай хамгийн бага зардал буюу ядуурлын шугам 2022 оны байдлаар 418 мянга 90 төгрөг байгаа аж.

Хүн амын суурьшлаар үзвэл Улаанбаатар хот болон аймгийн төвүүдэд ядуурлын түвшин 23 хувь байгаа бол сумын төв болон хөдөөд 35.6 хувь байна. Харин бүс нутгийн хувьд баруун бүсэд ядуурлын түвшин хамгийн өндөр буюу 36.5 хувь байгаа бол Улаанбаатарт хамгийн бага буюу 21.6 хувьтай байгаа ажээ.

Хэдийгээр ядуурлын түвшин Улаанбаатар хотод бага байгаа ч ядуурлын шугамаас доогуур хэрэглээтэй нийт хүн амын 37.4 хувь нь нийслэлд амьдарч байна. Өөрөөр хэлбэл нийслэл Улаанбаатар хотын таван хүн тутмын хоёр нь ядуурлын шугамаас бага хэрэглээтэй байгааг Үндэсний статистикийн хороо мэдээллээ.