Чип үйлдвэрлэгч “Intel” компани шинэ Гүйцэтгэх захирлаа сонгохдоо гаднын туршлагатай хүмүүст илүү анхаарах төлөвтэй байна.

Энэ хүрээнд тус компани “Marvell Technology” компанийн Гүйцэтгэх захирал Мэтт Мёрфи, “Cadence Design Systems”-ийн захирал  асан Лип-Бу Тан нарыг нэр дэвшигчдийн жагсаалтад оруулсан гэж эх сурвалжууд мэдээллээ.

“Intel”-ийн Гүйцэтгэх захирал Пэт Гельсингер энэ долоо хоногт гэнэтийн байдлаар ажлаа хүлээлгэн өгсний дараа компани удирдах ажилтан сонгох хайгуулдаа “Spencer Stuart” агентлагтай хамтран ажиллаж байна. Ингэхдээ компанийн дотоод албан тушаалтнуудаас гадна олон талын туршлагатай гаднын нэр дэвшигчдийг ч мөн судалж байгаа нь уламжлалаасаа хазайсан алхам болж байгаа аж.

Дээрх мэдээллийн дараа “Marvell” компанийн хувьцааны ханш мягмар гарагийн арилжаагаар 2.3 хувиар буурсан бол “Intel”-ийнх зургаан хувиар буурсан байна.