Монгол Улс болон БНСУ-ын хамтарсан 32 тэрбум төгрөгийн хөрөнгө оруулалттай “МДМ ампул фарм” компанийн тарилгын эмийн шинэ үйлдвэр ашиглалтад орлоо. Үйлдвэрийн төслийг  “Мөнхийн тун” ХХК, “Монгол Эм Импекс Концерн” болон БНСУ-ын “Донгү Био&Фарм” компани хамтран хэрэгжүүлсэн байна.

Энэхүү төсөл нь импортыг орлох, чанартай эмийг дотооддоо үйлдвэрлэх, цаашлаад олон улсын зах зээлд гаргах зорилготой төдийгүй БНСУ-ын эм үйлдвэрлэлийн зохистой дадал (Korean GMP)-ийн шаардлага хангах Монгол Улсын анхны үйлдвэр болохыг зорьж байгаа аж.

Европын Сэргээн Босголт Хөгжлийн Банк, Капитрон банк, ХААН банк болон бусад хоёр эх үүсвэрийн хөрөнгө оруулалт болон зээлээр санхүүжүүлжээ.

Тус үйлдвэр нь импортын бүтээгдэхүүнийг эхний ээлжид 30 хувь, цаашид 50 хувь орлох хүчин чадалтайг тус компанийн Гүйцэтгэх захирал онцоллоо.

Жилд 25-40 сая ширхэг тарилгын эмийн бүтээгдэхүүн үйлдвэрлэх бөгөөд 20 гаруй нэр төрлийн эмийн бүтээгдэхүүнийг Монголын болон БНСУ-ын стандартаар үйлдвэрлэж, зах зээлийн үнээс 15–20 хувиар хямд үнээр дотоодын хэрэглэгчдэд хүргэхээр байна.

Үүнээс гадна хаягдал ус, уурын эргэн ашиглалт болон эрчим хүчний хэмнэлтэд суурилсан шийдлүүдээрээ тус үйлдвэр 30–40 хувийн ус ба уурын хэмнэлт, 3-5 хувийн эрчим хүчний хэмнэлт бий болгох байгальд ээлтэй үйлдвэрлэлийн шинэ жишиг болж байгаа юм. Тарилгын эмийн үйлдвэр нь зөвхөн эрүүл мэндийн салбарт төдийгүй байгаль орчин хамгаалал, ногоон хөгжилд бодит хувь нэмэр оруулж, байгальд ээлтэй, хэмнэлттэй үйлдвэрлэлийн шинэ жишиг болж буйг “МДМ ампул фарм” онцолж байна.

Улсын хэмжээнд тарилгын эмийн “Цомбо” болон “Нахиа” хоёр үйлдвэр л байсан бол ийнхүү гурван үйлдвэртэй болж байгаа юм.