Дэлхийн шилдэг нисэх буудлаар жил бүр тодордог Сингапурын “Changi” нисэх буудал хүлээн авах зорчигчдынх нь тоог олон саяар нэмэгдүүлэх шинэ терминалынхаа шавыг тавилаа.

Энэ сарын эхээр тус нисэх буудал “Terminal 5”-ийн бүтээн байгуулалтын ажилд 3.7 тэрбум ам.долларын гэрээ байгуулснаа зарлаад байв. Цаашдаа бүтээн байгуулалтын явцад төслийн нийт өртөг олон арван тэрбумд хүрэхээр байгаа аж.

2030-аад оны дунд үед ашиглалтад орох товтой шинэ терминал эхэн шатандаа 50 сая зорчигчид үйлчлэх хүчин чадалтай байх тул “Changi” нисэх буудлын нийт хүчин чадлыг бараг хоёр дахин нэмэгдүүлэх юм. Мөн нислэг үйлдэх чиглэлийнх нь тоо 170-аас 200 болж нэмэгдэх аж.

Сүүлийн нэг жилийн хугацаанд “Changi” нисэх буудлаар нийт 68.4 сая зорчигч үйлчлүүлсэн нь түүхэн дээд үзүүлэлт болжээ.