(Bloomberg) -- БНПУ-ын Ерөнхийлөгчийн сонгуульд үндсэрхэг үзэлт нэр дэвшигч Кароль Навроцкий ялалт байгуулсан нь тодорхой боллоо. АНУ-ын Ерөнхийлөгч Дональд Трампын дэмжлэгийг аваад байсан Кароль Навроцкий урьдчилсан дүнгээр сонгогчдын 50.9 хувийн санал авч тэргүүлсэн бол төвийн үзэлт, Варшав хотын захирагч Рафал Тшасковский 49.1 хувийн санал авсан байна.

Хоёр өрсөлдөгчийн саналын зөрүү маш бага байсан нь Европын Холбоонд эдийн засгийн өсөлтөөр тэргүүлэгчдийн нэг Польш улсад цагаачлал, үр хөндөлт, Европын нэгдмэл байдал зэрэг асуудлуудаар иргэдийн үзэл санааны хуваагдал асар их байгааг харуулсан явдал боллоо. Кароль Навроцкий ялалт байгуулснаар Европын Холбоотой нягт харилцаатай ажилладаг Ерөнхий сайд Дональд Тускийн Засгийн газар томоохон цохилт амсаж байна.

Түүхч мэргэжилтэй, өмнө нь боксчин байсан Кароль Навроцкий өнгөрсөн сард Цагаан ордонд зочилж, АНУ-ын Ерөнхийлөгч Дональд Трамптай уулзаж байв. Түүнчлэн өнгөрсөн долоо хоногт АНУ-ын Дотоод хэргийн сайд Кристи Ноэм тус улсад айлчлахдаа АНУ-тай ойрын харилцаагаа хадгалахын тулд Кароль Навроцкийд заавал саналаа өгөх хэрэгтэйг польшуудад уриалж байлаа. Хэдийгээр сонгуулийн сурталчилгааны үеэр Рафал Тшасковский рейтингээрээ хол тэргүүлж байсан ч Кароль Навроцкий богино хугацааны дотор дэмжлэгээ үлэмж хэмжээнд нэмэгдүүлж чадсан байна.

Wojciech Moskwa, Agnieszka Barteczko