“Төрийн банк” ХК ирэх аравдугаар сард багтан Сингапур эсвэл Хонконг зэрэг гадаадын биржид бонд гаргаж магадгүй байгаагаа тус банкны Гүйцэтгэх захирал Ө.Гантөр мэдээллээ. Гэхдээ бондын үнийн дүн болон хугацаа зэрэг нарийн асуудлууд эцэслэгдээгүй, хөрөнгө оруулагчидтай яриа хэлэлцээр үргэлжилж буйг онцоллоо. Татан төвлөрүүлсэн хөрөнгийг ногоон бүтээгдэхүүн гаргах, болон арилжааны зориулалтаар зарцуулахаар төлөвлөж байгаа аж.

Өнгөрсөн оны 11 дүгээр сард үнэлгээний “Moody's” агентлаг Монгол Улсын зээлжих зэрэглэлийг есөн жилийн дараа ахиулсны дараахан дотоодын найман банкны зээлжих зэрэглэлийг ахиулан тогтоосон юм.

Түүнчлэн ирэх есдүгээр сард АНУ-ын Холбооны Нөөцийн банк бодлогын хүүгээ бууруулах хүлээлттэй байгаа нь “Төрийн банк” олон улсын зах зээлд шинээр бонд гаргахаар шийдвэрлэвэл харьцангуй таатай нөхцөл байдалтай давхцахаар байна.

Өнгөрсөн оны эцсээр “Төрийн банк” ХК 10 тэрбум төгрөгийн ногоон бонд биржийн бус зах зээлд гаргаж байсан ба энэ оны эхний хагас жилийн байдлаар цэвэр ашиг нь 31 тэрбум төгрөг хүрч, 30 хувиар буурсан үзүүлэлттэй байна. Дөрөвдүгээр сараас хойш тус компанийн хувьцааны ханш 440-460 төгрөгийн хооронд огцом өөрчлөлтгүй тогтвортой түвшинд арилжаалагдаж байгаа юм.