Улаанбаатар хотын орлого багатай өрхүүдийн хувьд түрээсийн орон сууцны үнэ өрхийн орлогоос 250 орчим хувиар өндөр байгааг “Барилга.МН”-ийн шинэ тайланд дурдсан байна. Мөн түрээсийн орон сууцны үнийн хэт туйлширсан байдалд зохицуулалт хийх шаардлагатай байгааг онцолжээ.

Судалгаанд дурдсанаар өрхийн дундаж бодит орлого 1.9 сая төгрөг байгаа бөгөөд түрээсийн орон сууцны үнэ, өрхийн орлоготой харьцуулахад харьцангуй өндөр гэж дүгнэсэн байна. Тухайлбал:  дээрх судалгаанд Хан-Уул дүүрэгт түрээсийн орон сууцны үнэ дунджаар 3.18 сая төгрөг гэж тооцоолсон нь орон сууц түрээсийн үнэ хамгийн өндөр дүүргээр нэрлэгдэж байна.

Харин Сонгинохайрхан дүүрэгт орон сууцны түрээсийн хамгийн хямд байгаа аж. Тус дүүрэгт түрээсийн орон сууцны дундаж үнэ 1.48 сая төгрөг байна. Сонгинохайрхан дүүрэгт байрлалтай  түрээсийн орон сууцны дийлэнх нь тавилгагүй, хуучны орон сууц бөгөөд байршлын хувьд хотын төвөөс зайтай нь үнэ хямд байх гол шалтгаан болж буй.

Үндэсний статистикийн хорооноос мэдээлснээр аравдугаар сарын байдлаар нийслэлд нэг өрөө орон сууцны түрээсийн дундаж үнэ 1.4 сая төгрөг, хоёр өрөө байрных 2.02 сая төгрөг, гурван өрөө байрных 3.05 сая төгрөг байна.