Монгол Улсын Ерөнхий сайд Н.Учрал 9 дүгээр сарын 1-4-ний өдрүүдэд ОХУ-ын Владивосток хотноо зохион байгуулагдаж буй Дорнын эдийн засгийн 11 дүгээр чуулга уулзалтад оролцохоор мордлоо.

Чуулга уулзалтад БНХАУ-ын Төрийн зөвлөлийн Шадар сайд, Индонез улсын Ерөнхийлөгч болон Мьянмарын дэд Ерөнхийлөгч зэрэг өндөр албан тушаалтан оролцохыг TASS агентлаг мэдээлж байсан юм.

Ерөнхий сайд Н.Учрал нэгдсэн хуралдаанд оролцож үг хэлэхээс гадна ОХУ-ын Ерөнхийлөгч Владимир Путинд бараалхаж, ОХУ-ын Төр, Засгийн удирдлага болон холбогдох байгууллагын төлөөлөлтэй хоёр талт уулзалт хийнэ.

Чуулга уулзалтын хүрээнд энэ жил анх удаа Монгол-ОХУ-ын бизнес хэлэлцүүлэг зохион байгуулагдана. Хоёр улсын Төр, хувийн хэвшлийн төлөөлөгчид оролцож, худалдаа, хөрөнгө оруулалтын орчныг сайжруулах, тээвэр, логистикийн хамтын ажиллагааг өргөжүүлэх зэрэг асуудлыг хэлэлцэх юм.

Дорнын эдийн засгийн чуулганы нөлөөгөөр бүс нутагт 14 их наяд рубль буюу 162 тэрбум ам.долларын өртөгтэй 3000 орчим төсөл хэрэгжиж буй. Үүнээс 6.5 их наяд рублийн хөрөнгө оруулалт аль хэдийн хийгдэж, 1100 гаруй аж ахуйн нэгж шинээр байгуулагдан, 180 мянган  ажлын байр бий болгоод буйг албаныхан тодотгож байна.